2011/09/09
Aiako amonek gogoan dute oraindik, igandero txistu eta danbolinaren soinu alaiak entzuten zirela plazan, Agur Mariako kanpaiak jo artean. Kanpai horiek berehala ilunduko zuela iragartzen zuten. Kanpai hotsa entzun bezain laster, erromeria bertan behera geratzen zen.

Gaur egun, ondorengo hauek dira Aiako jai nagusiak:

HERRIKO JAIAK:

San Donato eta San Lorentzo jaiak, abuztuaren 6tik 10ra bitartean. Era guztietako ekitaldiak izaten ditugu: kalejirak, elizkizunak, pilota partidak, herri jokoak, bertsolariak, erromeriak ...

ALTZOLA AUZOA:

azaroaren 18an, San Roman egunean. Auzo txiki honetan meza egiten dute lehenbizi, eta hamaiketakoa gero, batzuetan trikitilari eta bertsolariek alaituta.

ELKANO AUZOA:

San Pedroren omenezko jaiak (ekainaren 29an). Mezaren ondoren, herri kiroletako desafioak, bertsolariak eta erromeria izaten dituzte.

ITURRIOZKO JAIAK:

San Joan egunean, ekainaren 24an. Erromeria egiten dute. Lehenbizi, meza izaten dute goizeko 11etan. Meza bukaeran, bertan bildutako umeak banan banan bedeinkatzen ditu apaizak.

LAURGAINGO AUZOA:

irailaren 29an, San Migel egunean, meza izaten da eta erromeria gero herri-kirolekin alaituta. Herri-afaria ere bai.

ANDATZA AUZOA:

San Pedro egunean (ekainaren 29an). Azarotik maiatzera bitartean, trikitilariak eta erromeria izaten dituzte igande arratsaldetan.

SANTIO ERREKA AUZOA:

kanpai hotsaren bidez ematen diete hasiera festei (uztailaren 25ean). Hamaika ekitaldi antolatzen dituzte: herri jokoak, bertsolariak, herri kiroletako desafioak, anaitasun bazkariak eta erromeriak.

URDANETA AUZOA:

San Martin jaiak (azaroaren 11an). Herri kirolak, trikitilariak eta erromeriak izaten dira.

PAGOETA MENDIKO TOPAKETA:

ekaineko lehen igandean, Pagoeta mendiaren gailurrera biltzen dira mendizaleak.

ASENTZIOTAKO FERIA:

garai batean, eskualde osoko nekazari eta abeltzainak joaten ziren Igokundeko Feriara. 1987an, berriro antolatzen hasi ziren, arrakasta handiz. Jainkoaren Igokundearen hurrengo igandean izaten da. Aiako hirigunean egiten da dena: erakusketak, salmentak eta emankizunak.